हैदराबाद दुहेरी बॉम्बस्फोटाप्रकरणी दोघे दोषी...

( सह्याद्री बुलेटिन ) _ हैदराबाद दुहेरी बॉम्बस्फोटाप्रकरणी न्यायालयाने मंगळवारी निकाल दिला. न्यायालयाने अनिक शफिक सईद आणि इस्माइल चौधरी या दोघांना दोषी ठरवले असून अन्य दोन आरोपींना न्यायालयाने सबळ पुराव्या अभावी दोषमुक्त केले आहे. हैदराबादमधील गोकूळ चाट आणि लुंबिनी पार्क येथे २५ ऑगस्ट २००७ रोजी बॉम्बस्फोट झाले होते. या स्फोटात ४२ जणांचा मृत्यू झाला होता. तर ५० हून अधिक जण जखमी झाले होते. या प्रकरणी हैदराबादमधील एनआयएच्या विशेष न्यायालयात खटला चालवण्यात आला. तेलंगण पोलिसांनी या प्रकरणात दोन वेळा पुरवणी आरोपपत्र सादर केले होते. या प्रकरणात १७९ साक्षीदारांची साक्ष नोंदवण्यात आली. या प्रकरणात एकूण पाच आरोपींना पोलिसांनी अटक केली होती. मोहम्मद अकबर इस्माइल चौधरी, अनिक शफिक सईद, फारुख शर्फूद्दीन, मोहम्मद सादिक इसरार अहमद शेख आणि तारिक अंजूम अशी या अटक केलेल्या आरोपींची नावे आहेत. तर दोन आरोपी अजूनही फरार आहेत. पाचही आरोपी इंडियन मुजाहिद्दीन या दहशतवादी संघटनेशी संबंधित असल्याचे पोलीस तपासात समोर आले होते.