PulwamaAttack : दहशतवाद्यांना मोठी किंमत चुकवावी लागेल –पंतप्रधान मोदींचा इशारा

नवी दिल्ली,(सह्याद्री बुलेटीन)– दहशतवाद्यांनी चूक केली असून त्यांना मोठी किंमत चुकवावी लागेल, अशा तीव्र शब्दात पंतप्रधान नरेंद्र मोदी यांनी इशारा दिला आहे. भारतीय सैन्याला पूर्ण स्वातंत्र्य देण्यात आले आहे, असेही त्यांनी यावेळी सांगितले.

नरेंद्र मोदी म्हणाले की, आज प्रत्येक भारतीय शहीदांच्या कुटुंबीयांसोबत आहे. देशात आक्रोश आहे, लोकांचे रक्त उसळत आहे हे मला कळत आहे. लष्कराच्या शौर्यावर आम्हाला पूर्ण विश्वास असून योग्य माहिती सुरक्षा यंत्रणापर्यंत पोहोचवावी जेणेरुन दहशतवादाविरोधातील लढाई अजून तीव्र करता येईल. दहशतवादी संघटनानी खूप मोठी चूक केली असून त्यांना खूप मोठी किंमत चुकवावी लागेल. हल्ल्यामागे जी ताकद आहे, जे गुन्हेगार आहेत त्यांना नक्कीच शिक्षा मिळेल. जर आपल्या शेजारील राष्ट्राला वाटत असेल कि, भारतात अस्थिरता निर्माण होईल तर हा विचार सोडून द्या. ते कधी होणार नाही, असा विश्वास मोदींनी यावेळी व्यक्त केला. तसेच या घटनेनंतर भारतासोबत उभे राहणाऱ्या सर्व देशांचे मोदींनी आभार मानले.