पिंपरी-चिंचवडच्या महापौरपदासाठी मूळ ओबीसीच उमेदवार हवा अन्यथा येत्या निवडणुकीत भाजप विरोधी भूमिका - बारा बलुतेदार महासंघ आणि ओबीसी संघटनांचा इशारा

पिंपरी-चिंचवड महापालिकेचे महापौरपद इतर मागासवर्ग प्रवर्गासाठी (ओबीसी) राखीव आहे. पहिल्या सव्वा वर्षात नितीन काळजे यांना महापौरपद देऊन भाजपने शहरातील ओबीसी समाजाची घोर फसवणूक केली. आता नवीन महापौर निवडण्याची प्रक्रिया सुरू असून, हे पद मूळ ओबीसी नगरसेवकाला न मिळाल्यास आगामी निवडणुकांमध्ये शहरातील ओबीसी समाज भाजप-शिवसेनेविरोधी भूमिका घेणार असा इशारा बारा बलुतेदार महासंघ आणि ओबीसी संघटनांनि दिला आहे.

गुरूवारी पिंपरीत झालेल्या पत्रकार परिषदेत हा इशारा देण्यात आला. यावेळी बारा बलुतेदार महासंघाचे उपाध्यक्ष प्रताप गुरव, युवा प्रदेशाध्यक्ष विशाल जाधव, संघटक प्रदीप पवार, ओबीसी संघर्ष समितीचे अध्यक्ष आनंदा कुदळे ,भिकाजी भोज, वैजनाथ शिरसाट, सुरेश गायकवाड, नंदा कऱ्हे, भारत भोसले आदी उपस्थित होते.

प्रताप गुरव म्हणाले, “पिंपरी-चिंचवड, पुणे शहर आणि पुणे जिल्ह्यातून कुणबी जात दाखल्यावर विविध राजकीय पक्षांकडून निवडून आलेल्या सदस्यांविरोधात जात पडताळणी समिती तसेच न्यायालयाकडे दावे प्रलंबित आहेत. या दाव्यांच्या सुनावणी प्रसंगी बारा बलुतेदार महासंघ आणि ओबीसी महासंघाच्या प्रतिनिधींना बाजू मांडण्यासाठी संधी देण्यात यावी अशी लेखी मागणी महासंघाच्या वतीने करण्यात आली आहे.

महापालिकेत भाजपची प्रथमच सत्ता आली आहे. लोकसभा, विधानसभा निवडणुकीसोबतच महापालिकेच्या निवडणुकीतही ओबीसी समाज भाजप आणि शिवसेनेच्या पाठीशी बहुसंख्येने उभा राहिला. त्यामुळेच केंद्र, राज्य आणि पुणे, पिंपरी चिंचवडसह अनेक महापालिकांमध्ये भाजप आणि शिवसेनेची सत्ता आली. परंतु सत्ता आल्यानंतर भाजपाच्या पदाधिकाऱ्यांनी विविध पद वाटपात मूळ ओबीसी समाजावर अन्याय केला असल्याचे ठिकठिकाणी निदर्शनास आले आहे. पुणे, पिंपरी चिंचवड महापालिकेत कुणबी दाखल्यावर निवडून आलेल्या अनेक सदस्यांविरोधात जात पडताळणी समितीसमोर व विविध न्यायालयात आक्षेपाचे दावे प्रलंबित आहेत. तरी देखील अशा नगरसेवकांना भाजपने मूळ ओबीसींना डावलून विविध पदांवर नियुक्त केले आहे. भाजपने केलेल्या या राजकारणामुळे मूळ ओबीसी नगरसेवकांवर अन्याय झाला आहे. यामुळे राज्यात बहुसंख्य असलेल्या ओबीसी समाजामध्ये भाजपा व शिवसेने विरोधात प्रचंड नाराजीची भावना आहे.

नवीन महापौर निवडीची प्रक्रिया सुरू झाली आहे. महापौरपदावर मूळ ओबीसी नगरसेवकाला भाजपने संधी द्यावी. तसेच आगामी काळातही ओबीसींसाठी राखीव असणाऱ्या सर्व पदांवर मूळ ओबीसी सदस्यांचीच नियुक्त करावी. अन्यथा शहरातील ओबीसी मतदार आगामी निवडणुकांमध्ये भाजप, सेनेला घरी बसविल्याशिवाय राहणार नाही. ओबीसींना डावलणाऱ्या भाजपविरोधात संपूर्ण समाज रस्त्यावर उतरेल. असा इशारा यावेळी देण्यात आला.