रिंगणच्या रिंगणात पाच फिल्मफेयर पुरस्कार...

फिल्मफेअर पुरस्कार सोहळ्यामध्ये ‘रिंगण’ या चित्रपटाला पाच सर्वोत्कृष्ट पुरस्कार मिळाले आहेत.
फिल्मफेअर पुरस्कार सोहळ्यात लॅन्डमार्कच्या ‘रिंगण’ या चित्रपटाने पाच सर्वोत्कृष्ट पुरस्कारांवर आपलं नाव कोरल्यामुळे विधि कासलीवाल यांच्या लॅन्डमार्क फिल्म्सच्या शिरपेचात आणखीन एक मानाचा तुरा रोवला गेला आहे. लॅण्डमार्क फिल्म्स राष्ट्रीय तसेच आंतरराष्ट्रीय पुरस्कारास पात्र अशा दर्जेदार चित्रपटांची निर्मिती आणि प्रस्तुती करत असते. या पुरस्कार सोहळ्यामध्ये सर्वोत्कृष्ट अभिनेत्याचा क्रिटीक्स अवॉर्ड शशांक शेंडे यांना देण्यात आला असून, साहील जोशीला सर्वोत्कृष्ट बालकलाकाराचा आणि दिग्दर्शकीय पदार्पणासाठी व कथेसाठी मकरंद माने यांना गौरविण्यात आले. तसेच आदर्श शिंदेला सर्वोत्कृष्ट पार्श्वगायकासाठी सन्मानित करण्यात आले. नुकत्याच पार पडलेल्या या पुरस्कार सोहळ्यातील अंतिम नामांकन यादीत लॅन्डमार्क फिल्म्सला एकूण १६ नामांकने प्राप्त झाली होती. ज्यात ‘गच्ची’ या चित्रपटाच्या २ नामांकनांचादेखील समावेश आहे. ‘गच्ची’ चित्रपटातील सर्वोत्कृष्ट अभिनेत्रीसाठी प्रिया बापटला आणि सर्वोत्कृष्ट ध्वनीमुद्रणसाठी मनोज मोचेमाडकर यांना नामांकन प्राप्त झाले होते.‘रिंगण’ चित्रपटाला १४ नामांकने जाहीर झाली होती. ज्यामध्ये सर्वोत्कृष्ट चित्रपट (क्रिटिक्स), सर्वोत्कृष्ट सहाय्यक अभिनेत्रीसाठी कल्याणी मुळे, सर्वोत्कृष्ट गीतलेखनासाठी दासू वैद्य आणि वैभव देशमुख, सर्वोत्कृष्ट पार्श्वगायकासाठी अजय गोगावले, सर्वोत्कृष्ट छायाचित्रकारासाठी अभिजित अब्दे, सर्वोत्कृष्ट संवादासाठी मकरंद माने, सर्वोत्कृष्ट पार्श्वसंगीतासाठी गांधार आणि सर्वोत्कृष्ट ध्वनीमुद्रणसाठी महावीर सब्बनवर यांचा समावेश होता.