लवकरच तुळजाभवानी देवीच्या रोकड ठेवींचा शंभर कोटींचा आकडा पार होईल,,,

महाराष्ट्राची कुलस्वामिनी तुळजाभवानी देवीच्या चरणी भाविकांनी अर्पण केलेली रोकड यंदा १०० कोटींचा टप्पा पार करणार आहे. साडेतीन शक्तीपीठांपैकी एक पूर्णपीठ असलेल्या तुळजाभवानी देवीच्या दर्शनासाठी देशभरातून येणार्‍या भाविकांच्या संख्येत उल्लेखनीय वाढ होत आहे. विशेषतः शारदीय आणि शाकंभरी नवरात्र महोत्सव वगळता महालक्ष्मी, संक्रांत, नागपंचमी, शिवजयंती, गुढी पाडवा, दिवाळी पाडवा आणि अक्षय तृतीया या सणावारांला भाविक तुळजाभवानी देवीच्या दर्शनासाठी मोठी गर्दी करू लागले आहेत. त्यामुळे देवीच्या दानपेटीत नवरात्रोत्सवाबरोबरच या प्रमुख सणाला देखील घसघशीत रोकड जमा होऊ लागली आहे. परिणामी तुळजाभवानी देवी यंदा १०० कोटींची धनी झाली आहे. तुळजाभवानी मंदिर संस्थानचे वार्षिक उत्पन्न सुमारे ३० कोटींच्या घरात आहे. यात रोकड अंदाजे २० कोटी रूपयांच्या आसपास दानपेटीतून तसेच प्रशासन कार्यालयात अधिकृतरित्या जमा केलेल्या देणगीतून जमा होते. मागील ठेवी आणि देवीचरणी सलग दहा वर्षांत भाविकांनी अर्पण केलेली रोकड असे एकूण ९५ कोटी रूपये तुळजाभवानी मंदिर समितीकडे सध्या जमा आहेत.यंदाच्या नवरात्रोत्सवात यात भर पडून शंभर कोटींचा आकडा नक्की पार केला जाईल, असा विश्वास मंदिर समितीच्यावतीने व्यक्त केला जात आहे.