धानोरीत महिलेचा गळा दाबून खून ?

धानोरी येथे हुंडा न दिल्याने महिलेचा गळा दाबून खून केल्याची घटना घडली आहे. या प्रकरणी विश्रांतवाडी पोलिसांकडून दिरासह तीन महिलांना अटक करण्यात आली आहे.
कविता चेतन रेड्डी (वय २८, रा. आनंद पार्क सोसायटी, धानोरी) असे खून झालेल्या महिलेचे नाव आहे. या प्रकरणी दीर सोनू अंजनिया रेड्डी (वय २४) याच्यासह त्याची आई, मामेसासू आणि नणंदेला अटक करण्यात आली आहे. कविता यांचे वडील करबसप्पा हणमंतराव मळ्ळी (वय ६०, रा. गुलबर्गा, कर्नाटक) यांनी या संदर्भात विश्रांतवाडी पोलीस ठाण्यात फिर्याद दिली आहे. कविताचा दीड वर्षांपूर्वी चेतन यांच्याशी विवाह झाला होता. चेतन बांधकाम ठेकेदार आहे.आनंद पार्क भागात रेड्डी कुटुंबीयांचा बंगला आहे. विवाहानंतर सासू, दीर, नणंद आणि मामेसासूने कविताचा छळ सुरू केला.
कविताच्या वडिलांनी दिलेल्या फिर्यादीत सासू, दीर, मामेसासू आणि नणंदेने तिचा गळा दाबून खून केल्याचा संशय व्यक्त केला आहे. गुन्हे शाखेचे पोलीस निरीक्षक ए. जी. सायकर तपास करत आहेत.