राफेल विमान खरेदीच्या व्यवहारात अनेक मुद्दे संशयास्पद - सुप्रिया सुळे

राफेल विमान खरेदीच्या व्यवहारात अनेक मुद्दे संशयास्पद आहेत, सरकार स्वत:चा पारदर्शी असा प्रचार करते आहे तर संयुक्त संसदीय समितीच्या चौकशीला का तयार होत नाही, त्यातुन खरे, खोटे काय ते बाहेर येईल, लपवण्यासारखे काहीच नसेल तर सरकार का घाबरते आहे, असा सवाल राष्ट्रवादी काँग्रेसच्या नेत्या, खासदार सुप्रिया सुळे यांनी केला.
श्रीमती सुळे सध्या नगरच्या दौऱ्यावर आहेत, त्यांच्या विविध ठिकाणी सभा होत आहेत. त्यांनी नगरमध्ये पक्ष कार्यालयात पदाधिकाऱ्यांची बैठक घेतली तसेच शहरातील राधाबाई काळे महाविद्यालयातील विद्यार्थ्यांशी संवाद साधला. त्यानंतर त्या पत्रकारांशी बोलत होत्या. आ. संग्राम जगताप, जिल्हाध्यक्ष राजेंद्र फाळके, माजी आमदार दादा कळमकर, कार्याध्यक्ष संदीप वर्पे, अंबादास गारुडकर आदी उपस्थित होते.
दिल्लीत शेतक ऱ्यांच्या मोर्चावर केलेला लाठीमार भाजप सरकारला महागात पडेल, आमच्या विरोधात बोलाल तर आम्ही तुम्हाला अटक करु किंवा लाठीमार करु, ही भाजपची दडपशाही आहे, भाजप सरकार शेतकऱ्यांविरुद्धही दबावतंत्राचा वापर करत आहे, असा आरोपही त्यांनी केला.
रस्त्यातील खड्डय़ांमुळे सर्वसामान्यांना मोठा त्रास सहन करावा लागतो, अनेकांचे मृत्यू त्यामुळे घडलेले आहेत, जीव मुठीत धरुन प्रवास करावा लागतो, याकडे लक्ष वेधताना खा. सुप्रिया सुळे यांनी सरकार या प्रश्नावर असंवेदनशील असल्याचा आरोप केला व मुख्यमंत्र्यांनी या प्रश्नात जातीने लक्ष घालावे, असे पत्र पाठवल्याची माहिती दिली. मुख्यमंत्री विरोधी पक्षनेता असताना, आमच्यावर खुनाचा गुन्हा दाखल करा, असे म्हणत होते, आता कोणावर गुन्हा दाखल करायचा, या मृत्यूला जबाबदार कोण याचेही उत्तर त्यांनी द्यावे, असा प्रश्न त्यांनी केला. गेल्या वर्षभरात खड्डय़ांवर राज्यात किती खर्च केला, याची माहिती आपण माहिती अधिकाराचा वापर करुन मागवली असल्याचे त्यांनी सांगितले.