टेपरेकॉर्डरवर गाणं जोरात लावल्याच्या कारणावरुन पोलिसांनी केली मारहाण, तरुण चालकाचा मृत्यू

टेपरेकॉर्डरवर गाणं जोरात लावल्याच्या कारणावरुन पोलिसांनी ट्रॅक्टर चालकाला मारहाण केली आणि यातच त्याच मृत्यू झाला.
प्रदीप कल्याण कुटे (वय २४, राहणार उस्मानाबाद ) असे मयत झालेल्या युवकाचे नाव आहे. त्याचा विवाह अवघ्या सहा महिन्यापूर्वीच झाला होता.
प्रदीप कल्याण कुटे रविवारी माढा तालुक्यातील केवडच्या बबनराव शिंदे साखर कारखान्यासाठी धानोरे येथून ऊस घेऊन निघाला होता. त्याच्यासोबत ट्रॅक्टर ट्रॉलीत त्याची आई देखील होती. मानेगाव येथे पोहोचले असता टेपरेकॉर्डरवर गाणं जोरात लावल्याच्या कारणावरुन पोलिसांनी त्याला अडवले. यानंतर पोलिसांनी प्रदीपला चौकीत नेऊन त्याला मारहाण केली. हा प्रकार सुरु असताना त्याची आई ट्रॅक्टर ट्रॉलीत बसली होती.

मारहाणीत गंभीर जखमी झालेल्या प्रदीपला तातडीने माढ्याच्या ग्रामीण रुग्णालयात दाखल करण्यात आले. मात्र, रुग्णालयात उपचारापूर्वीच त्याचा मृत्यू झाला. पोलिसांनी या प्रकरणी आकस्मिक मृत्यूची नोंद केली. मात्र, पोलिसांनी केलेल्या मारहाणीमुळेच त्याचा मृत्यू झाला, असा आरोप प्रदीपच्या नातेवाईकांनी केला आहे. संतप्त नातेवाईक आणि ग्रामस्थांनी रास्ता रोको करुन संबंधित पोलिसांवर गुन्हा दाखल करण्याची मागणी करत रास्ता रोको देखील केला. रात्री उशिरापर्यंत प्रदीपच्या नातेवाईकांनी माढा पोलीस ठाण्यात ठिय्या मारला होता. या घटनेची माहिती मिळताच सोलापूर ग्रामीणचे अप्पर पोलीस अधीक्षक मिलिंद मोहिते यांनी पोलीस ठाण्यात जाऊन या संपूर्ण प्रकरणाच्या चौकशीला सुरुवात केली. प्रदीपचा विवाह अवघ्या सहा महिन्यापूर्वीच झाला होता. त्याच्या पश्चात पत्नीसह आई-वडील व भाऊ असा परिवार आहे.