चिंचवडमध्ये डांबराचा मुलामा देवून ठेकेदाराकडून जनतेची फसवणुक
पिंपरी ( सह्याद्री बुलेटिन ) - गेल्या एक महिन्यापूर्वी आनंदनगर मधील रस्त्याचे डांबरीकरण करण्याचे काम करण्यात आले आहे. सदर डांबरीकरण झाल्यानंतर सर्व रस्त्यांना मोठ मोठे खड्डे पडले आहेत. संबंधीत ठेकेदाराने प्रचलीत नियमानुसार शेड्युल बी नुसार काम न करता जुन्या रस्त्याला फक्त डांबराचा रंग, मुलामा मारला आहे. या रस्त्याचे काम निकृष्ट दर्जाचे झाले असून उच्च स्तरीय समिती नेमून चौकशी करावी, अशी मागणी ज्ञानेश्वर सिद्राम इटकल यांनी केली आहे,
रस्त्यावर ठेकेदाराने डांबर टाकून त्यावर कच म्हणजे दगडाचा चुरा टाकून त्यावर रोडरोलर फिरविण्यात आले आहे. त्यामुळे या रस्त्याचे काम निकृष्ट दर्जाचे झाले असून महिन्यातच सर्व रस्ते उखडलेले आहेत. संबंधीत ठेकेदाराने जुन्या रस्त्यावरच फक्त डांबराचा मुलामा देवून महापालिका आणि नागरिकांची दिशाभूल केली असून आनंदनगर मधील रस्ता डांबरीकरणाचे ऑडीट व्हावे, अशी मागणी ज्ञानेश्वर सिद्राम इटकल,( रा. आनंदनगर, चिंचवड स्टे. पुणे, 19) यांनी केली आहे. यासंदर्भात पिंपरी चिंचवड महापालिका आयुक्त श्रावण हर्डीकर, शहर अभियंता (पिं.चिं.मनपा.), कार्यकारी अभियंता, (पिं.चिं.मनपा.) यांना मागणीचे निवेदन देण्यात आले आहे.
ठेकेदाराने मनपाची तसेच जनतेची फसवणुक केलेली आहे. तसेच मनपाचे संबंधीत विभागातील अधिकारी यांनी ठेकेदाराला मदत केली आहे. रस्त्याचे काम करणार्या ठेकेदाराची सर्व बिले त्वरीत थांबविण्यात यावी. तसेच, रस्त्याचे काम करणार्या ठेकेदाराच्या प्रत्येक कामाचे ऑडीट व्हावे. त्याचप्रमाणे रस्त्याच्या कामातील भ्रष्टाचार उघडकीस आणण्यासाठी उच्च स्तरीय समिती नेमून चौकशी व्हावी, असेही ज्ञानेश्वर इटकर यांनी निवेदनात नमूद केले आहे.