ज्यादा दराने आलेल्या या निविदांमुळे कोट्यावधी रुपयांचा अर्थिक ‘भुर्दंड’, निविदा रद्द करा - तुषार कामठे

पिंपरी (सह्याद्री बुलेटिन ) - स्थापत्य विभागामार्फत डांगे चौक व काळेवाडी फाटा येथे ग्रेडसेपरेटर बांधण्याच्या कामासाठी निविदाप्रक्रिया राबविण्यात आली आहे. परंतु, या कामासाठी संबधित ठेकेदाराने निविदा दरापेक्षा मोठ्या प्रमाणात ज्यादा दराने निविदा भरल्या आहेत. ज्यादा दराने आलेल्या या निविदांमुळे कोट्यावधी रुपयांचा अर्थिक ‘भुर्दंड’ महापालिकेला सोसावा लागणार आहे. तरी अशा प्रकारच्या जादा दराच्या निविदा रद्द करून त्या कामांच्या फेरनिविदा काढाव्यात अशी मागणी तुषार कामठे यांनी महापालिका आयुक्त श्रावण हर्डीकर यांच्याकडे निवेदनाव्दारे केली आहे.

पिंपरी चिंचवड महापालिकेच्या वतीने शहरामध्ये ठिकठिकाणी प्रशस्त रस्ते, उड्डाणपूल आणि ग्रेडसेपरेटर आणि इतर कामे केली जात आहेत. या कामांचे निविदा दर महापालिकेच्या संबधित विभागातील अधिकाऱ्यांमार्फत निश्चित केले जातात. त्याआधारे निविदा प्रक्रिया राबवून कमी दराने काम करण्याची तयारी दर्शविणाऱ्या निविदाधारकाकडून काम करून घेतले जाते. परंतु, महापालिकेत मागील काही महिन्यांपासून अधिकारी व ठेकेदार यांच्यात संगनमताने ज्यादा दराच्या निविदा भरल्या जात आहेत. या प्रकारांमुळे महापालिकेचे तसेच पर्यायाने शहरातील करदात्या नागरिकांचे आर्थिक नुकसान होत आहे. ही बाब नुकतीच स्थापत्य विभागाच्या वतीने राबविण्यात आलेल्या निविदा प्रक्रियेवरून निदर्शनास आली आहे. ही निविदाप्रक्रिया राबविणाऱ्या संबधित स्थापत्य विभागातील सर्व अधिकारी व ठेकेदारांची चौकशी करावी, अशी मागणी नगरसेवक तुषार कामठे यांनी केली आहे.