मराठा आरक्षणाला स्थगिती देण्यास उच्च न्यायालयाचा नकार

मराठा आरक्षणाला तूर्तास स्थगिती देण्यास उच्च न्यायालयाने नकार दिला आहे. अॅड. सदावर्ते यानी, महाराष्ट्र सरकारने मराठा समाजाला आरक्षण देऊन घटनाबाह्य निर्णय घेतला आहे. घटनेनुसार 50 टक्के पेक्षा अधिक आरक्षण देता येत नाही. त्यामुळे आरक्षण रद्द करावे अशी याचिका उच्च न्यायालयात दाखल केली होती. यावेळी, तातडीने आरक्षणाला स्थगिती देण्यास उच्च न्यायालयाने नकार दिला तसंच या प्रकरणी 2014 सालीही एक याचिका दाखल झाली होती, त्या याचिकेवर आणि गुणरत्न सदावर्तेंच्या याचिकेवर येत्या 10 डिसेंबर रोजी सुनावणी घेतली जाईल असं न्यायालयाने स्पष्ट केलं आहे. मुख्य न्यायमूर्ती नरेश पाटील यांच्या खंडपीठासमोर याचिकेवर सुनावणी होणार आहे.

यापूर्वी आज (दि.5) मराठा आरक्षणाविरोधात न्यायालयात धाव घेणाऱ्या जयश्री पाटील यांचे वकील गुणरत्न सदावर्ते हे अनुपस्थित राहिल्याने मराठा आरक्षणवर तातडीने सुनावणी घेण्यास मुंबई उच्च न्यायालयाने नकार दिला होता. याचिका दाखल करण्यासाठी ऑन रेकॉर्ड वकील उपस्थित असणे आवश्यक असते, या तांत्रिक मुद्द्याच्या आधारावर न्यायमूर्तींनी याविषयी तातडीने सुनावणी घेण्यास नकार दिला. मात्र संबंधित पक्षकारांना याचिका सादर करण्यासाठी दुपारी 3 वाजेपर्यंतची मुदत दिली होती. त्यानुसार, दुपारी 3 वाजता न्यायालयाने यावर सुनावणी पूर्ण केली आणि मराठा आरक्षणाला स्थगिती देण्यास उच्च न्यायालयाने तूर्तास नकार दिला आहे.