उत्तरप्रदेशात अखिलेशचे मायावी रूप,,, सपा, बसपा एकत्र...

दिल्ली ( सह्याद्री बुलेटिन ) - उत्तर प्रदेशात भाजपाविरोधात समाजवादी पक्ष आणि बहुजन समाज पक्ष एकत्र आले आहेत. शनिवारी लखनौत सपाचे अध्यक्ष अखिलेश यादव आणि बसपाच्या अध्यक्षा मायावती यांनी संयुक्त पत्रकार परिषद घेत ही घोषणा केली.
नरेंद्र मोदी आणि अमित शाह यांची झोप उडवणारी ही पत्रकार परिषद ठरेल, असे सांगत मायावती यांनी बसपा- सपा आघाडीची घोषणा केली. भाजपाच्या हुकमी कारभाराविरोधात आम्ही एकत्र आले असून जनतेला आमच्याकडून आशा आहेत, असे त्यांनी सांगितले म्हटले आहे.

लखनौतील पंचतारांकित हॉटेलमध्ये अखिलेश यादव आणि मायावती यांनी संयुक्त पत्रकार परिषद घेतली. या पत्रकार परिषदेत त्यांनी काँग्रेस व भाजपावर निशाणा साधला. काँग्रेसच्या काळात देशात घोषित आणीबाणी होती, तर आता देशात अघोषित आणीबाणी आहे, अशी टीका त्यांनी केली. स्वातंत्र्यानंतर काँग्रेसकडे अनेक वर्षे सत्ता होती ,काँग्रेसच्या काळातही भ्रष्टाचार, गरिबी वाढली, असा आरोप त्यांनी केला. काँग्रेस- भाजपाची अवस्था एकसारखीच आहे, दोन्ही सरकारच्या काळात घोटाळे झाले आहेत, काँग्रेसच्या काळात त्यांना बोफोर्स घोटाळ्यामुळे सत्ता गमवावी लागली होती, तर आता भाजपाला राफेल घोटाळ्यामुळे सत्ता गमवावी लागेल, असा दावा त्यांनी केला. मायावतींचा अपमान हा माझा अपमान आहे, या महाआघाडीसाठी मी मायावतींचा आभारी आहे, असे अखिलेश यादव यांनी सांगितले.