रान्या राव अटक: १४ किलो सोने जप्त, राज्यात खळबळ!

सोन्याची तस्करी प्रकरण: अभिनेत्री रान्या रावला अटक, १४ किलो सोने जप्त

बेंगळुरू: कन्नड चित्रपटसृष्टीतील प्रसिद्ध अभिनेत्री रान्या रावला महसूल गुप्तचर संचालनालयाने (डीआरआय) बेंगळुरू आंतरराष्ट्रीय विमानतळावर अटक केली आहे. तिच्याकडून तब्बल १४.८ किलो सोने जप्त करण्यात आले आहे. दुबईहून परतलेल्या रान्या रावने आपल्या पट्ट्यात आणि कपड्यांमध्ये हे सोने लपवून नेण्याचा प्रयत्न केला. मात्र, आधीपासून संशयाच्या फेऱ्यात असलेल्या रान्याला अधिकाऱ्यांनी ताब्यात घेतले आणि तिच्याकडून मोठ्या प्रमाणात तस्करी केलेले सोने जप्त करण्यात आले.

काय आहे संपूर्ण प्रकरण?

रान्या राव सोमवारी रात्री एमिरेट्सच्या विमानाने दुबईहून बेंगळुरू आंतरराष्ट्रीय विमानतळावर पोहोचली. गेल्या १५ दिवसांत ती चार वेळा दुबईला गेली होती, त्यामुळेच तपास यंत्रणांना तिच्यावर आधीपासूनच संशय होता. विमानतळावर पोहोचल्यावर अधिकाऱ्यांनी तिच्यावर बारीक नजर ठेवली आणि तपास केला असता तिच्याकडून सोन्याच्या सळ्या आणि ८०० ग्रॅम वजनाचे सोन्याचे दागिने जप्त करण्यात आले.

डीआरआय अधिकाऱ्यांच्या माहितीनुसार, रान्या रावने काही सोने पट्ट्यात लपवले होते तर काही कपड्यांमध्ये नीट बांधून ठेवले होते. अधिकाऱ्यांनी तिच्यावर कारवाई करत तिला ताब्यात घेतले आणि न्यायालयात हजर केले. न्यायालयाने तिला १४ दिवसांची न्यायालयीन कोठडी सुनावली आहे.

पोलीस महासंचालकांची मुलगी असल्याचा फायदा उचलण्याचा प्रयत्न

मीडिया रिपोर्टनुसार, रान्या रावने विमानतळावर उतरल्यावर स्वत:ची ओळख कर्नाटक पोलीस महासंचालक (डीजीपी) रामचंद्र राव यांची मुलगी म्हणून दिली. तसेच, सरकारी प्रोटोकॉल सेवांचा गैरफायदा घेऊन तिने सुरक्षा तपासणी टाळण्याचा प्रयत्न केला. मात्र, डीआरआय अधिकाऱ्यांनी तिच्यावर संशय घेत तपास केला आणि मोठ्या प्रमाणात सोने जप्त केले.

सध्या तपास यंत्रणांकडून याचा तपास सुरू आहे की, रान्या राव एकटीच या तस्करीत गुंतलेली होती की तिच्या मागे कोणत्या मोठ्या रॅकेटचा हात आहे. अधिकाऱ्यांनी तिच्या दुबईच्या प्रवासाच्या सर्व नोंदी तपासण्यास सुरुवात केली आहे. तसेच, ती दुबईत कोणकोणाला भेटली, तिचे व्यावसायिक संबंध कोणाशी होते, याचा तपास केला जात आहे.

रामचंद्र राव यांची प्रतिक्रिया

या घटनेनंतर माध्यमांनी कर्नाटक पोलीस महासंचालक रामचंद्र राव यांच्याशी संपर्क साधला असता त्यांनी या प्रकरणाशी कोणताही संबंध नसल्याचे स्पष्ट केले. “रान्या माझी मुलगी असली तरी तिच्या वैयक्तिक आयुष्याशी किंवा व्यवसायाशी माझा काहीही संबंध नाही. चार महिन्यांपूर्वी तिने जतीन हुक्करीशी लग्न केले होते, जो शहरातील प्रसिद्ध पब आणि मायक्रोब्रुअरी डिझाइन करणारा आर्किटेक्ट आहे. लग्नानंतर तिने आमच्याशी फारसा संपर्कही साधला नाही. तिच्या तस्करीशी मी किंवा माझ्या कुटुंबाचा कोणताही संबंध नाही,” असे त्यांनी स्पष्ट केले.

रान्या राव कोण आहे?

रान्या राव ही कन्नड चित्रपटसृष्टीतील एक प्रसिद्ध अभिनेत्री आहे. तिने २०१४ मध्ये सुपरस्टार किच्चा सुदीपसोबत ‘माणिक्य’ चित्रपटात काम केले होते. तसेच, ती तेलुगू आणि तमिळ चित्रपटांमध्येही झळकली आहे. तिच्या अटकेमुळे संपूर्ण दक्षिण चित्रपटसृष्टीत मोठी खळबळ उडाली आहे. अनेक चाहत्यांना आणि सहकलाकारांना हा धक्का बसला आहे.

या संपूर्ण प्रकरणाचा तपास डीआरआयकडून सुरू असून, पुढील काही दिवसांत आणखी धक्कादायक खुलासे होण्याची शक्यता आहे. आता पाहावे लागेल की या प्रकरणात आणखी कोणाचा सहभाग आहे आणि रान्या राववर कोणत्या अन्य गंभीर कारवाई केली जाते.